به‌ ناوی کوردستانی گه‌وره‌ .

ح. س. سۆران

تاران - 20/4/2708

قسه‌ی نێو به‌ تاڵ ،وه‌ک گوێزی پووچه‌ڵ وایه‌ .

هاوژینی(خانمی) یه‌کێک له‌ پیاوه‌ هه‌ره‌ ‌هه‌‌ڵکه‌وتو و مه‌زنه‌کانی کوردستان ، که‌ به‌ به‌رزی باڵای چیای سه‌ربه‌رزی کێوی قه‌ندیل و به‌ پانایی گۆلی زه‌مه‌نی وان، خزمه‌تی فه‌رهه‌نگی به‌ ئێمه‌ کردوه‌ و له‌وانه‌یه‌ بڵێم هه‌مو کوردێک ده‌یناسێ- ، له‌ پاش کۆچی دوایی مێرده‌که‌ی ، فره‌ نه‌خۆش و پاکه‌فته‌ بو .

قوربان گیان ! نازانی خه‌ڵک ماموه‌ستایان چه‌ند خۆش ده‌ویست و به‌ هه‌زاران کوڕیان به‌ ناوی ئه‌وه‌وه‌ ناو ناوه‌ ، جاری وا هه‌یه‌ له‌سه‌ر ئه‌وه‌ی کێ زۆرتری ماموه‌ستا خۆش ده‌وێ ، له‌ کۆبوونه‌وه‌ و کۆڕه‌کان ده‌بێته‌ کێشه‌ ، کێ به‌رکێ ، ده‌مقڕڕه‌ و هه‌را .

به‌ڵام به‌م گشته‌ حه‌یس و به‌یسه‌وه‌ ، که‌ بێ ئاماژه‌ به‌ ناوی ماموه‌ستا بۆم باس کردن ، با‌وه‌کو ماموه‌ستا منداڵی زۆر دڵسۆز و باشیشی هه‌یه‌ ، بۆ ئه‌وه‌ی منداڵه‌کان زۆر ماندوتر نه‌بن ، ده‌مانویست ئافره‌تێکی که‌یبانو ده‌ست بخه‌ین خزمه‌تی خێزانه‌ پاکه‌فته‌ و نه‌خۆشه‌که‌ی ماموه‌ستا بکا‌ ، که‌ له‌ نزیکه‌وه‌ ئاگادارم ئه‌و خاتوونه‌ که‌م وێنه‌یه‌ زۆر له‌ سه‌رکه‌وتنی مێرده‌که‌ی دا شوێنی بوه‌ و له‌وئافره‌تانه‌ بوه‌ ، که‌ به‌ گیان و به‌ دڵ خزمه‌تی به‌ مێرده‌که‌ی کردوه‌ ‌ . به‌ڵام له‌ نزیکه‌ی 50 میلیۆن کوردو حه‌شیمه‌تی کوردته‌بار ، که‌ ده‌بێ نزیکه‌ی نیوه‌یان ئافره‌ت بن ، که‌سێک نه‌بو بڵێ من ئه‌و خزمه‌ته‌ پڕ شانازیه‌ وه‌ ئه‌ستۆ ده‌گرم . ته‌نانه‌ت خێزانی ماموه‌ستا پاره‌شی ده‌دا که‌سمان گیر نه‌ده‌که‌وت ،ئه‌گه‌ر ‌‌ به‌ کێشه‌ کێش ، که‌سێک یشمان بۆ په‌یدا ده‌کرد ، کاتێ ده‌هاتن له‌و بابه‌ته‌وه‌ قسه‌ له‌ گه‌ڵ خێزانی ماموه‌ستا بکه‌ن ، ده‌توت ده‌یانه‌وێ له‌ گه‌ڵ کۆمپانیای شێلی هۆله‌ند گرێ به‌ست ( قه‌رارداد)ی نه‌وتی بنووسن ، له‌سه‌ر دو قڕان مانیان ده‌گرت ، پایان ده‌چه‌قاند ، له‌ ژێری ده‌رده‌چوون و کاره‌كه‌ تێک ده‌چو .

کاتێ ئه‌م شته‌ زه‌ق و سه‌یرانه‌م دی ، له‌به‌ر خۆمه‌وه‌ وتم : " قسه‌ی نێو به‌ تاڵ وه‌ک گوێزی پووچه‌ڵ وایه" ؛ ئه‌و ئافره‌ته‌ بۆ ئێمه‌ په‌یکه‌ری دروشمێکی پیرۆزه‌ ‌ ، بۆ قه‌ره‌بو کردنه‌وه‌ی خزمه‌تی په‌نجا ساڵه‌ی مێرده‌که‌ی ، خۆی و بنه‌ماڵه‌که‌ی ، که‌ هێنده‌ تاریفیان ده‌که‌ن و به‌ شان و باڵیان دا هه‌ڵ ده‌لێن ، نابێ له‌ دو قڕان چاوپۆشی بکه‌ن ؟ نابێ له‌ گه‌ڵ خه‌ڵکی ئاسایی تۆفیری بخه‌ن .نابێ ...؟ به‌ڵام هه‌ر چۆن بو ، رێگه‌یه‌کی دیکه‌ په‌یدا بو .

کوردینه‌ ! دیسان ده‌ڵێم " قسه‌ی پووچه‌ڵ ، وه‌ک گوێزی پووچه‌ڵ وایه‌ ‌" . ماموه‌ستای هاوبیر و گه‌وره‌م ئه‌حمه‌د موختار جاف ، له‌ روانگه‌یه‌کی گشتی کوردایه‌تیه‌وه‌ ده‌فه‌رموێ " قسه‌ ناچێته‌ نێو گیرفانه‌وه‌ " . جا ، که‌ وایه‌ وه‌رن با به‌ کرده‌وه‌ی پته‌و و راسته‌ قینه‌ ، خزمه‌تی ئافره‌ت و پیاوه‌ مه‌زنه‌کانمان بکه‌ین ، که‌ ئه‌رکیان به‌ سه‌ر شانمانه‌وه‌ هه‌یه‌ ، نه‌ک هه‌ر به‌ قسه‌ .

ئایا پێتان سه‌یر نیه‌ ، که‌سێک بتوانێ به‌ به‌لاش و خوڕایی- هه‌ر له‌ پێناوی خه‌ڵک و نیشتمان ویستی دا -، خزمه‌تی هه‌مه‌ لایه‌نه‌ به‌ نزیکه‌ی په‌نجا میلیۆن کورد بکا ، به‌ڵام په‌نجا میلیۆن که‌س نه‌توانن ته‌نانه‌ت به‌ پاره‌ش ( نه‌ک به‌ خۆڕایی) ، خزمه‌ت به‌ خێزانه‌که‌ی ئه‌و بکه‌ن ؟

ئه‌مه‌ به‌ یه‌کێک له‌ درمه‌کانی کۆمه‌ڵایه‌تی "ده‌رده‌ کورد ‌" داده‌نرێ ، وه‌رن بۆ سه‌رکه‌وتن به‌ره‌و دوندی به‌رکه‌وت ، یه‌که‌ به‌ یه‌که‌ کوان و دمه‌ڵی در‌مه‌کان مان سارێژ بکه‌ین .

گه‌لۆ ! تۆغا وانه‌ ؟

بگه‌رێوه