ئه‌مساڵ دوای ئه‌وه‌ که‌ لیژنه‌ی ئاماده‌کاری بۆ باشتر به‌رێوه‌بردنی ئه‌و یاده‌ هه‌ڵبژێردرا، له‌ یه‌که‌م کۆبوونه‌وه‌ی ئه‌و لیژنه‌یه‌ دا بریار درا که‌ سێ ڕۆژ به‌ دوای یه‌ک دا واته‌ ڕۆژانی8،7،6ی پوشپه‌ر به‌ شێوه‌یه‌کی جوان و باش که‌ شیاوی ئه‌و ڕۆژه‌ بێت، ڕێ‌وڕه‌سمه‌که‌ به‌ڕێوه‌ به‌رن.

یادی بیسته‌مین ساڵڕۆژی شیمیابارانی سه‌رده‌شت به‌یانی ڕۆژی 6ی پوشپه‌ر به‌ به‌شداری سه‌دان که‌س له‌ خه‌ڵکی سه‌رده‌شت و ده‌ورووبه‌ری له‌ بنکه‌ی فه‌رهه‌نگی هونه‌ری سه‌رده‌شت له‌ ژێر ناوی کۆنگره‌ی کاره‌ساتی شیمیابارانی سه‌رده‌شت ده‌ستی به‌ کاره‌کانی خۆی کرد، دوای ئه‌وه‌ که‌ چه‌ند که‌س له‌ به‌شداربووان قسه‌یان له‌ سه‌ر ئه‌و جنایه‌ته‌ کرد، له‌ سه‌ر سه‌رچاوه‌ی سه‌رده‌شت له‌ ناوه‌ندی شار مۆنێمێتی یادی شه‌هیدانی شیمیابارانی سه‌رده‌شت به‌ فه‌رمی کرایه‌وه‌، پاش نێوه‌رۆی هه‌مان ڕۆژ له‌ سینمای شاری سه‌رده‌شت دوای به‌خێر هاتنی به‌شداربووان و به‌ تایبه‌ت وه‌ڤدی هه‌ڵبجه‌ ده‌ستی خوشکی سه‌رده‌شت، به‌رنامه‌کان ده‌ستی پێکرده‌وه‌ و کۆمه‌ڵێک به‌رنامه‌ی جۆراوجۆر بۆ ئه‌م یاده‌ له‌ کات و ساتی خۆیدا به‌رێوه‌چوون، ده‌سته‌یه‌ک له‌ دووچه‌رخه‌سوارانی شاری مه‌ریوان له‌ لایه‌ن هه‌ئیه‌تی به‌رێوه‌به‌ری و لێژنه‌ی ئاماده‌کاری به‌ خێرهاتن کران، دووچه‌رخه‌سوارانی مه‌ریوان به‌ هاتنیان به‌ دووچه‌رخه‌ بۆ شاری سه‌رده‌شت ڕێزیان له‌ قوربانیانی ئه‌و کاره‌ساته‌ گرت و هه‌ڵگری هاوخه‌می و هاوده‌ردی خۆیان و خه‌ڵکی شاری مه‌ریوان بوون بۆ بنه‌ماڵه‌ی قوربانیان و خه‌ڵکی زامداری شاری سه‌رده‌شت. له‌ درێژه‌ی به‌رنامه‌کانی یه‌که‌م ڕۆژ دا کۆمه‌ڵێک له‌ کچانی ده‌ڤه‌ری سه‌رسه‌وزی سه‌رده‌شت به‌ پێشکه‌ش کردنی سروودێک سرنجی هه‌موو لایه‌کیان بۆ لای خۆیان ڕاکێشا، هه‌ر ئه‌م ڕۆژه‌ کۆمه‌ڵێک چالاکی دیکه‌ش به‌رێوه‌ چوون، یه‌ک له‌وان کردنه‌وه‌ی پێشانگای وێنه‌ بوو، که‌ کۆمه‌ڵێک وێنه‌ و نیگاری جۆراوجۆری شاری سه‌رده‌شت و ده‌وربه‌ری له‌ خۆ گرتبوون، ئه‌و وێنه‌ و ره‌سم و نیگارانه‌ به‌رهه‌می چوارکه‌س له‌ هونه‌رمه‌ندانی ده‌ست ڕه‌نگینی شاری سه‌رده‌شت بوون و بریاره‌ که‌ شه‌ش ڕۆژ ئه‌و پێشانگایه‌ کراوه‌ بێت به‌ ڕووی خه‌ڵکه‌وه‌.

سه‌ر له‌ به‌یانی ڕۆژی 7ی پوشپه‌ر شه‌قامه‌کانی شار جمه‌یان ده‌هات، دووکان و بازاره‌کان داخرا بوون، نێزیک به‌ 4000 که‌س خه‌ڵک له‌ شه‌قامی سه‌ره‌کی شار کۆببوونه‌وه‌، ده‌یان پلاکاردی جۆراوجۆر و وێنه‌ی شه‌هیدانی کاره‌ساتی شیمیابارانی سه‌رده‌شت به‌ ده‌ست خه‌ڵکه‌وه‌ بوون، هه‌موو چین‌وتووێژه‌کانی شاری سه‌رده‌شت و ده‌وروبه‌ری به‌شداری ئه‌و یاده‌ بوون، خوێندکار و مامۆستا، کاسبکار و بازاری، کرێکار و وه‌ستا و به‌ گشتی منداڵان، لاوان، ژن و پیاوان و پیر و به‌ ساڵاچوان و هه‌موو دڵسۆزانی شار کۆببوونه‌وه، پاش ئه‌وه‌ که‌ چه‌ند که‌س له‌ به‌شداربووان قسه‌یان کرد به‌ گشتی خه‌ڵک به‌ ڕێپێوان به‌ نێو شه‌قامه‌کانی شار دا به‌ داب‌ونه‌ریتی ناوچه‌که‌ به‌ ده‌ف لێدان به‌ره‌و مه‌زاری شه‌هیدان و گۆرستانی گرده‌سوور که‌وتنه‌ ڕێ و له‌ ماوه‌ی ڕێگا پێوانیان دا، تا له‌ گۆرستان نێزیک‌تر ده‌بوونه‌وه‌ ئاپۆرای خه‌ڵک و رێپێوانه‌که‌ زیاتر ده‌بوو، ده‌سته‌یه‌ک له‌ شاخه‌وانانی شاری سه‌رده‌شت (تیم کوهنوردی هه‌ژار) وه‌ک ڕێز لێنان له‌ شه‌هیدانی ئه‌و کاره‌ساته‌ به‌ نووسراوه‌ و پلاکاردی تایبه‌ت به‌ گرووپی خۆیان تێکه‌ڵ به‌ ئاپۆرای خه‌ڵک بوون، دیاره‌ دوای سه‌ردانی خه‌ڵک له‌ گۆرستانی شه‌هیدان و دانانی چه‌پکه‌ گوڵ له‌ سه‌ر گۆری شه‌هیدانی ئه‌و کاره‌ساته‌ تا ئێواره‌ کۆمه‌ڵێک چالاکی هونه‌ری و ئه‌ده‌بی دیکه‌ بۆ ڕێز لێنان له‌و ڕۆژه‌ به‌رێوه‌چوون و چه‌ندین که‌س له‌ به‌شداربووان هه‌ستی خۆیان به‌ نووسراوه‌ سه‌باره‌ت به‌ جنایه‌تی 7ی پوشپه‌ر به‌ ده‌ستی ڕژیمی به‌عس ده‌ربری.

رۆژی 8ی پوشپه‌ر تایبه‌ت بوو به‌ کێ‌به‌رکێی وه‌رزشی، خه‌ڵکێکی زۆر له‌ باشگای شار کۆببوونه‌وه‌ بۆ دیتنی کاره‌ وه‌رزشی‌یه‌کانی وه‌رزشڤانانی شار و تیمه‌کانی میوان، دیاره‌ پێویسته‌ ئاماژه‌ به‌وه‌ بکرێ که‌ نێزیک مانگێک پێشتر داوا له‌ تیمی کاراته‌کارانی وڵاتانی فه‌رانسا، ئینگلیس، پورته‌قاڵ، ئۆزبه‌کستان و ژاپۆن کرا بوو که‌ به‌شداری له‌و کێ‌به‌رکێ‌یه‌ دا بکه‌ن و ئه‌وانیش ئاماده‌گی خۆیان ده‌ربری بوو، به‌ڵام دوای ئه‌وه‌ فدراسیۆنی وه‌رزشی ئێران و پارێزگای ورمێ ئاماده‌ نه‌بوون که‌ خه‌رجیی میوانه‌کان بکێشن و ڕزایه‌تیان بۆ هاتنی ئه‌و تیمانه‌ نه‌دا، له جێگای ئه‌و تیمانه‌، بۆ خۆیان بانگهێشتی 5 وڵاتی دیکه‌یان کرد بوو، که‌ بریتی بوون له‌ ئێراق، تورکیه‌، ئه‌فغانستان، لوبنان و فه‌له‌ستین، دیاره‌ له‌و 5 وڵاته‌ش دوو تیمی ئێراق و تورکیه‌ به‌شداری ئه‌و کێ‌به‌رکێ‌یه‌ نه‌بوون.

له‌و کێ‌به‌رکێ‌یه‌ دا کاراته‌کارانی شاری سه‌رده‌شت و پارێزگای ورمێ توانیان تیمی میوانه‌کان ببه‌زێنن و پله‌ی یه‌که‌م به‌ ده‌ست بێنن، ئاکامی ئه‌و کێ‌به‌رکێ‌یه‌ به‌م شێوه‌یه‌ بوو، کاراته‌کارانی سه‌رده‌شت و ورمێ پله‌ی یه‌که‌م، کاراته‌کارانی ئه‌فغانستان پله‌ی دووهه‌م و کاراته‌کارانی لوبنان پله‌ی سێهه‌میان وه‌ده‌ست هێنا، دوای کۆتایی هاتنی کێ‌به‌رکێ له‌ لایه‌ن کۆمیته‌ی ئاماده‌کاری و لیژنه‌ی ئه‌و رێ‌وره‌سمه‌ خه‌ڵات به‌ سه‌ر تیمه‌کان دا دابه‌ش کرا و چالاکی‌یه‌کانی ئه‌و ڕۆژه‌ش به‌م شێوه‌یه‌ کۆتایی پێهات.

دیاره‌ له‌ سه‌ریه‌ک له‌ یادی بیسته‌مین ساڵوه‌گه‌ری شیمیابارانی سه‌رده‌شت دا کۆمه‌ڵێک چالاکی وه‌رزشی و هونه‌ری و ئه‌ده‌بی به‌رێوه‌ چوون و ئه‌مساڵ زۆر به‌شکۆوه‌ ئه‌م یاده‌ کرایه‌وه‌.

خه‌ڵکی شاری سه‌رده‌شت و ده‌وربه‌ری نیشانیان دا که‌ هه‌موو کات و ساتێک ڕۆژه‌ مێژووی‌یه‌کانی خۆیان له‌ بیره‌و ئاماده‌ن به‌ که‌مترین ئیمکاناتیش بێت یاد و بیره‌وه‌ری ڕۆژه‌ مێژووی‌یه‌کانی خۆیان و گه‌له‌که‌یان بگرن و ڕێز له‌ خۆشه‌ویستانی له‌ ده‌ستچووی خۆیان بگرن.

سڵاو له‌ شه‌هیدانی 7ی پوشپه‌رێ 1366ی هه‌تاوی شاری سه‌رده‌شت
هیوای ساخ بوونه‌وه‌ و سارێژبوونه‌وه‌ی زامی، زامدارانی شیمیابارانی سه‌رده‌شت به‌ ئاوات ده‌خوازین.