به‌ ناوی کوردستانی گه‌وره‌ .

ح. س. سۆران

تاران –3/10/2707

جه‌ژنی قوربانی برایم پێغه‌مبه‌ر و خه‌ڵیفه‌ ئه‌ردۆغان .

له‌ زوربه‌ی کتێبه‌ ئاسمانیه‌ کانی ئایینگه‌لی رۆژهه‌ڵاتی نێوه‌ڕاست دا نووسراوه‌ ،‌ کاتێک برایمی خه‌لیلی پێغه‌مبه‌ر ویستی سمایلی هه‌ژاری کوڕی به‌ چه‌قۆ کوله‌ یه‌ک سه‌رببڕی و بیکاته‌ قوربانی!!! ، خودا له‌ ئاسمانی حه‌وته‌مه‌وه‌ ، به‌ تاڵووکه‌ به‌ فریای سمایلی هه‌ژار که‌وت و له‌ که‌وشه‌نی غه‌یبه‌وه‌ مه‌رێکی قه‌ڵه‌وی نارد ، که‌ برایمی خه‌لیل له‌ باتی کاک سمایل ، ئه‌و مه‌ڕه‌ سه‌رببڕی و بیکاته‌ شێخ مه‌حشی ، موشه‌ککه‌ل ، شاورمه‌ ‌ و شت و بیبه‌خشێته‌وه‌ . برایمی خه‌لیل ، که‌ هێندێک خه‌ڵکی ده‌مبه‌تاڵ به‌ ویته‌ ده‌ڵێن دانیشتوی ده‌ڤه‌ری برایم خه‌لیل بوه‌ ، بێ ئه‌وه‌ی که‌ڵوه‌جه‌ڕی (کێشه‌) له‌گه‌ڵ خودای توانا بکا ، به‌ قسه‌ی خودا گیانی کردو‌ و له‌ باتی سمایلی کڵۆڵ ، مه‌ڕ‌ی بێزمانی سه‌ربڕی‌ . گۆیا جه‌ژنی قوربانی موسوڵمانان ، له‌و رووداوه‌ وه‌ ، سه‌رچاوه‌ی گرتوه‌ !!!

ئه‌مساڵیش ( ساڵی 2707 ی کوردی) ، له‌ کاتی هه‌مان جه‌ژنی قوربان دا ، که‌ به‌ هه‌زاران کورد، تورک و تاتی موسوڵمان، به‌ بیروڕای ئایینی دژی وه‌ک کارد و په‌نیره‌وه‌ ، له‌ عا‌ره‌بستان خه‌ریکی مه‌ڕ ، بزن و وشتر سه‌ر بڕین بوون ، خه‌ڵیفه‌ ئه‌ردۆغانی هه‌وه‌ڵ ، که‌ جێ نشینی ره‌سه‌نی خه‌ڵیفه‌ غازیه‌کانی عوسمانیه‌ و ئه‌وانیش نزیکه‌ی یه‌ک میلیۆن که‌س ئه‌رمه‌نی بێ تاوانیان قوربانی کردوه‌ ، گازی کرده‌وه‌ ، که‌ ده‌بێ به‌ فرمانی زۆرایه‌تی ئه‌ندامانی کاروانسه‌رای ئانکاڕا ، له‌ باتی سارای عه‌ره‌فات ، له‌ ده‌ڤه‌ری قه‌ندیل، وه‌ک سمایلی کوڕی برایم پێغه‌مبه‌ر ، کورد قوربانی بکا . هه‌ر له‌و کاته‌ش دا به‌ عه‌زرا به‌یان ( عه‌زرا خانم) ی خێزانی وتبو ، که‌ چون رێبه‌ری حێزبی داد و گه‌شه‌یه‌ و خۆی و بنه‌ماڵه‌ی ، بۆ چوونه‌ به‌هه‌شت کاندیدا کردوه‌ ، نابێ له‌و مانگه‌ پیرۆزه‌دا ، به‌ مسقاڵ له‌چکه‌که‌ی شل ببه‌ستێ و دانه‌یه‌ له‌ موی سه‌ری نیشان هه‌تیومه‌تیوی غه‌واره‌ی چاوچو بدا ، ده‌نا کابه‌ که‌ج ده‌بێ و جه‌ژنی قوربانی کردنی کورد، لای خودا گیان به‌ تاڵ ده‌بێ .

به‌ کورتی ، له کاتی مانگی قوربان دا ، به‌ نزیکه‌ی 100 دانه‌ فرۆکه‌ی بۆمب و مووشه‌ک هاوێژه‌وه‌ ، هێرشیان هێنا سه‌ر ده‌ڤه‌ری قه‌ندیل و به‌ بیانوی قه‌لاچوی پ.ک.ک ، قه‌ندیلی کابه‌ی کوردستانیان به‌ خه‌ستی بۆمباران کرد ، که‌ له‌م هێرشه‌ چه‌نگیز خانیه‌ دا ، زۆر که‌سی ئاسایی و ئاپۆره‌ی منداڵ ، ئافره‌ت و پیر لاو کوژران ، بریندار بوون ، ماڵ وێران و ئاواره‌ کران و به‌خه‌ڵکی نیشان دا ، ئه‌گه‌ر سه‌د+دام له‌ چاڵ نراوه‌ ، هاواڵه‌کانی ، له‌ دژایه‌تی و قه‌لاجۆی کورد دا، هه‌ر رژد ، زیندو و به‌رده‌وامن و ته‌نانه‌ت له‌ باتی گازی خه‌رده‌ل ، که‌ڵکیان له‌ گازگه‌لی کیمیایی وه‌ک فۆسفۆڕ و شتی دیش وه‌رگرت .

هه‌رچه‌ند ئه‌ز پسۆڕی به‌ستێنی ئایینی نیم و به‌ وته‌ی کوردی خۆمان ، به‌ قه‌ت حه‌مه‌ ئاشه‌وان فتوام پێ نادرێ ، به‌ڵام به‌ دیتتنی ئه‌و مه‌ڕه‌ لاق په‌ڕیوه‌ ، که‌ له‌ سه‌ر شاشه‌ی تێلێڤیزیۆنه‌کان ، له‌ ژێر بۆردمانی ( بۆمبارانی) ئه‌ردۆغان دا ده‌مدی ، چون مانگی قوربانیش بو ، کوتم ره‌نگه‌ خودا گیان به‌ سه‌روه‌ر جوبره‌ئیلی ئه‌مینی فه‌رموبێ، مه‌رێکی قه‌ڵه‌و هه‌ڵگره‌ و به‌ تاڵووکه‌ بچۆ بۆ ده‌ڤه‌ری قه‌ندیل ، با ئه‌ردۆغان وه‌ک برایم خه‌لیل ، له‌ باتی ئه‌وه‌ی مرۆڤ قوربانی بکا، ئه‌و مه‌ڕه‌ سه‌برێ ، به‌ڵام داروده‌سته‌ی ئه‌ردۆغان ئه‌و کاره‌یان نه‌کرد ، هه‌م پای مه‌ڕه‌که‌یان به‌ گولله‌ په‌ڕاند ، هه‌م خه‌ڵکه‌که‌شیان قه‌لاچۆ کرد و هه‌م روی خه‌لووزیشیان سپی کرد . ته‌نانه‌ت له‌وه‌ش ده‌چێ، ئه‌و پۆست فاشیستانه‌ی ئانکاڕا ، پێیان وابێ خودا به‌ هه‌ڵه‌ کوردی خه‌لق کردوه‌ ، ده‌نا مافێک ، زمانێک ، ده‌وڵه‌تێک ، پشتیوانێک ، فڕۆکه‌یه‌ک ، مووشه‌کێک ، شتێکی هه‌ر پێ ده‌دا . مه‌گه‌ر شه‌نده‌ له‌ مه‌نده‌ که‌متره‌ ؟؟؟

چاره‌ : هرزی هه‌مو مرۆڤێکی نادۆغانیست پێشنیاری ئه‌وه‌یه‌ ، که‌ ئه‌گه‌ر ده‌سته‌ڵاتی تورکیا ، به‌ قیرسیچمه‌یی و سمنجی ، هه‌ر گۆێی بۆ په‌یامی دۆستی، ئاشتی و برایه‌تی کورد شل نه‌کرد و درێژه‌ی دا به‌ ئاکاری دۆغانیزم ، هێزی پێشمه‌رگه‌ی هه‌رێمی کوردستانیش ، بێته‌ مه‌یدانی مه‌ته‌ر‌ێزی نامووس و به‌رگری و ؛ باکووری ئێڕاق له‌ باشووری، خراپتر بشه‌مزێنی ، تا بووش ببێته‌ مووش و له‌ گه‌ڵ خاتو شالیاری ( وه‌زیڕی) هین و مین ره‌شی خۆی دا ، ته‌گبیری خۆیان به‌ وردی بکه‌ن و به‌ بیریان بێته‌وه‌ و بزانن ، که‌ ئه‌گه‌ر کورد و هێزی پێشمه‌رگه‌ی کوردستان نه‌بێ ‌ ، ئێڕاق ده‌بێته‌ ‌ قه‌برستانی ئاڕلینگتۆنی دووهه‌م و له‌ کن ئه‌لقاعیده‌ و فڵان و فیسار ، هه‌زا‌ر دانه‌ (God bless you ) ، دو سێنت ناژی و له‌وانه‌یه‌ نیوه‌ی ئامریکاش وه‌ک جاری پێسو ، بته‌قێننه‌وه‌ و ته‌نا‌نه‌ت له‌ لاسوێگاسیش ، کونه‌ مشکێکیان به‌ هه‌زار‌ بۆشکه‌( به‌رمیل)، نه‌وتی که‌رکووک گیر نه‌که‌وێ .

قسه‌ قسه‌ ده‌هێنێ ، ئه‌گه‌ر پ.ک.ک تێڕۆریست بێ ، ئه‌و ئامریکاییانه‌ش که‌ ده‌یانویست له‌ جه‌نگی سه‌ربه‌خۆیی دا ، وڵاته‌که‌یان له‌ ژێر ده‌ست بڕیتانیا بهێننه‌ ده‌ره‌وه‌ ، تێررۆریست بوون ، که‌ یه‌کێک له‌وانه‌ به‌رێز جۆرج واشینگتۆن بو ‌ ؟؟؟ به‌س بۆ ئه‌و گڵکۆ به‌ شکۆیه‌یان ، له‌ پشت کۆشکی سپی بۆ دروست کردوه‌ ؟ ئه‌گه‌ر ئاپۆ تێڕۆڕیست بێ ، شێخ عوبه‌یدیللای نه‌هریش ، ساڵی 1880 تێڕۆڕیست بوه‌ ، ده‌نا بۆ باو و باپیری ئه‌ردۆگان دووریان خسته‌وه‌ بۆ به‌ندیخانه‌ی حیجاز له‌ عاره‌بستان و هه‌ر له‌وێش کۆچی دوایی کرد . کامه‌ تێڕۆڕیست ، ئارکاداش؟! به‌ وته‌ی کوردی " شه‌ڕ له‌ سه‌ر لێفه‌ی مه‌لایه‌ " . تێبینی : له‌م نوسراوه‌یه‌دا ، ته‌نیا مه‌به‌ست شه‌رمه‌زار کردنی هه‌ڵس و که‌وتی تورکیایه‌ ، ده‌نا بیر و باوه‌ڕی ئایینی هه‌ر که‌س بۆ خۆی جێی رێزه‌ و به‌شێکه‌ ‌ له‌ مافه‌کانی مرۆڤ .

بگه‌رێوه