زینی زه‌مان :

مه‌وته‌نی من سه‌رفه‌رازه‌ ، دوندی هه‌ورازم هه‌یه 
زه‌ردی به‌رز و شاخی ته‌رزو جه‌ننه‌تی نازم هه‌یه‌ 

کاتێ یادی کێوی گۆیژه‌ و ئه‌زمه‌ر و شاهۆ ئه‌که‌م 
وه‌ک په‌پووله‌ی زایری شه‌م،عه‌زمی په‌روازم هه‌یه‌

زێده‌که‌م زینی زه‌مانه‌ ، من مه‌می بۆتانی ئه‌و
زه‌مزه‌می زه‌نوێری زاب و ده‌شتی دریازم هه‌یه‌ 

میلله‌تی من کۆمه‌ڵێکه سه‌رگوڵی باغی جیهان
پیاوی چاک و لاوی پاک و کیژی ته‌ننازم هه‌یه

فه‌خری ناوی ئه‌رده‌ڵان و موکری و بابان ئه‌که‌م
خانی له‌پزێڕ و بوداق و میری پێبازم هه‌یه‌ 

هۆنه‌ری هۆزێ هه‌ژارم بۆیه‌ وا ناوم گومه‌
سه‌د هونه‌رمه‌ند و ئه‌دیبی شاز و بێنازم هه‌یه‌ 

من که‌ غه‌وواسم له‌ به‌حری قووڵی قامووسی گه‌لم
گه‌وهه‌ری نابی به‌دیع و گه‌نجی ئه‌لفازم هه‌یه‌ 

ئه‌ز له‌ جێگه‌ی که‌شکه‌ خۆره‌ و داڵی چرچ و کونده‌بو
سه‌قر و شمقاڕ و شه‌هێن و شاهه‌ڵو و بازم هه‌یه‌ 

وێژه‌رانی نوکته‌زان و نووسه‌رانی به‌رزه‌بیر 
بولبولانی نه‌غمه‌ خوانی نه‌غمه‌ په‌ردازم هه‌یه‌ 

ده‌نگی شێعری دڵنه‌وازم وا کپ و ئه‌سپاییه‌
باوه‌کو پسپۆڕی سازم ، سازی ناسازم هه‌یه‌ 

گه‌ر به‌ عه‌سته‌م بیدڕێنن لاپه‌ڕه‌ی په‌رده‌ی دڵم
سه‌د په‌ژاره‌ و ره‌مزی گه‌وره‌و رازی ده‌مسازم هه‌یه‌ 

من له‌ جێگه‌ی بووکی شووشه‌ و ئه‌سپی کایه‌ و ره‌وڕه‌وه‌
بۆ مناڵانی وڵاتم، میت و گه‌ڵوازم هه‌یه‌ 

خاوه‌نی قامی قه‌تار و دمدم و سوارۆ منم 
پڕ به‌ که‌ڵوێ به‌یت و باو و شێعر و ئاوازم هه‌یه‌ 

چانیه چاچا و بره‌یک و راکی و تانگۆ و تویست 
چۆپی و رۆینه‌ و شێخانی و نه‌زمی سێبازم هه‌یه‌ 

په‌یڕه‌وی ئه‌فکاری خه‌ڵک و خووخده‌ی بێگانه‌ نیم 
مه‌کته‌بێکی تازه‌ ساز و خاسه‌ رێبازم هه‌یه‌ 

عاشقێکی سینه‌چاکی خاکی سۆرانم ئه‌من 
وه‌ک مه‌سیحا وه‌ختی وه‌سفی سیحر و ئیعجازم هه‌یه‌ 

ح . س. سۆران