به‌ ناوی کوردستانی گه‌وره‌ .

ح. س. سۆران

soransa@hotmail.com

تاران -  15/3/2708

ماڵ  و‌  مزگه‌وت :

هه‌مو ده‌زانین ، ته‌واوی پێنج پارچه‌که‌ی کوردستانی گه‌وره‌ ، به‌ چه‌شنی ناونجی  و ناوه‌ندی له‌ هه‌رێمی وشکی جیهان دا هه‌ڵکه‌وتوون ‌ و ئه‌گه‌ر ده‌ڤه‌ری پڕ بارشتی وه‌ک ناوچه‌ی باڵه‌کایه‌تی ، هه‌ورامان  ، ئالانی سه‌رده‌شت و کوێستانه‌کانی ئاگریمان هه‌یه‌ ، ئه‌م  مه‌ڵبه‌ندانه‌ ره‌نگه‌ پێنج له‌سه‌دی خاکی کوردستان نابن  و تازه‌ ئاوی بارشتی ئه‌و ناوچانه‌ش زوربه‌ی بێ که‌ڵک وه‌رگرتنی ئه‌وتۆی کشت و کاڵی و هیدڕۆئێلێکتریک  ، ده‌ڕژێنه‌ چه‌م و چه‌ماوه‌کان و زۆرتریان ده‌چنه‌  که‌نداوی ناوه‌ندی (که‌ هی واهه‌یه‌ پێی ده‌ڵێ که‌نداوی فارس و هیواش هه‌یه‌ ناوی ناوه‌ که‌نداوی عاره‌ب ) یا گۆلی ورمێ و وان و  ئه‌وانه‌ . ‌

له‌ لایه‌کی دیکه‌وه‌،  هه‌ر وه‌ک ده‌زانین ئه‌مساڵ وشکه‌ ساڵیه‌کی نه‌گبه‌ت و زه‌مه‌ن زوربه‌ی وڵاتی کوردستانی گه‌وره‌ی دا گرتوه‌ ، به‌ چه‌شنیکی وا ، که‌ زۆر له‌ به‌رهه‌مه‌ کشت و کالیه‌کان وشک بوون و زۆر گوند و هه‌وار له‌ به‌ر‌ بێ ئاوی چوڵیان کردوه‌ و چه‌شنێک گرانی و قاتوقڕه‌ . خۆشتان ده‌زانن ژێرخانی ئابووری کوردستان ،  له‌ سه‌ر کۆڵه‌که‌ی کشت و کاڵ و ئاژه‌ڵداری به‌نده‌ و به‌م له‌ونه‌ ، ئێستا قه‌یرانێکی ئابووری زۆر گه‌وره‌ له‌ ئارادایه‌ ، که‌ ره‌نگه‌ له‌ په‌نجا ساڵی رابوردو دا ، وێنه‌ی که‌م بووبێ و هاوکات گرانیه‌کی زۆر نه‌گبه‌ت و چه‌توونیش له‌ گورێ دایه‌  ‌ . بۆ وێنه‌ هه‌ر له‌ رۆژهه‌ڵاتی کوردستان  ، له‌و کاته‌وه‌ ژنه‌ ره‌شتاڵه‌ ( رایس = برنج ) هاتوچۆی  ناوچه‌ی‌ کوردستانه‌کان ده‌کا  ، ره‌نگه‌ برنج سێ به‌رابه‌ر گرانتر بووبێ ، جا نازانم ئه‌گه‌ر دیک ( چینی ) ش زۆر ته‌شریف بهێنێ و سه‌رمان بدا ، بایی چینی و حاچه‌ت و حوجه‌ت  چه‌ند به‌رابه‌ر گران ده‌بێ؟؟؟ !!!

دیاره‌ ئاکامی ئه‌م وشکه‌ ساڵیه‌ ، زۆرتر له‌ وه‌رزی پایز دا خۆی ده‌نوێنێ و ده‌بێ بۆ به‌ربه‌ره‌کانێ له‌گه‌ڵ ئه‌م کاره‌ساته‌ پڕمه‌ترسیه‌،  به‌رنامه‌ رێژی ورد و توێکمه‌ بکرێ ، که‌ زۆرایه‌تی به‌رنامه‌ رێژیش له‌ ده‌ست کوردی بن ده‌ست و ده‌سته‌ ڵاتی ده‌ڵه‌مه‌ کورد دا نیه‌ . وه‌ک هه‌میشه‌ ته‌نیا نه‌گبه‌تیه‌که‌ی ده‌بێ به‌ به‌شی کورد .

به‌ڵام زۆر شتی جکۆله‌ش ، ها  له‌ ده‌ست خۆمان دا . بۆ وێنه‌ چوونی حه‌ج و بردنی ئه‌و گشته‌ پاره‌ ‌ بێ زمانه‌ بۆ خادیمانی زگ زلانی حه‌ره‌مانی شه‌ره‌یفان   و قوربانی کردنی وشتر و په‌ز و مه‌ز بۆ ئه‌وان ، که‌ قه‌ت بۆ ده‌رمان ددانیان به‌ بوونی کورد دا نه‌ناوه‌ و  له‌سه‌رمان نه‌هاتوونه‌ جواب ‌  و ‌ ‌ زۆر زۆر له‌ ئێمه‌ش ساز و تێر و ته‌یار ترن و (خودا قه‌ڵه‌تریان بکا )، هێنده‌ چێشتی  شێخ مه‌حشی ، شاورمه‌  ، موشه‌که‌ل  ،  شامی قۆزی و شتییان حه‌م کردوه‌ ، که‌ کولێره‌ له‌ ملیان بخه‌ی ، چه‌ور ده‌بێ !!!  ، ده‌بێ به‌ پێی زمان بیری لێ بکرێته‌وه‌  .

من وه‌ک خاوه‌ن بیرێکی دێمۆکڕاسی  ئازاد و  راسته‌قینه‌  ، نامه‌وێ بۆچونی خۆم به‌سه‌ر                  که‌س دابسه‌پێنم  یا تانه‌ و تنووت  و توانج له‌‌ هیچ ئایین و بڕوایه‌ک بده‌م ، یانی ئایین و بڕوای هه‌رکه‌س بۆ خۆی جێگه‌ی رێزه‌ و مسقاڵی قسه‌م له‌ سه‌ر ئه‌مه‌ نیه‌ ، به‌ڵام  له‌م بارودۆخه‌ ناله‌بار  و وشکه‌ساڵیه‌دا ، هه‌ر ئه‌و وته‌ ئایینیه‌ وه‌بیرده‌خه‌مه‌وه‌ ، که‌ ده‌ڵێ " تا ماڵ بیه‌وێ ، له‌ مزگه‌وت حه‌رامه‌ " و داوا له‌ ته‌واوی هاو وڵاتیانی کوردستانی گه‌وره‌ ده‌که‌م ، که‌ به‌ لای که‌مه‌وه،‌  ئه‌مساڵ پاره‌ی ئه‌و سه‌فه‌ره‌ بۆ نه‌دار ، ئاتاج و هه‌ژاره‌کانی کوردی جیرانیان له‌ کوردستان  خه‌رج   بکه‌ن ، دڵنیا بن په‌روه‌رده‌گار  و په‌یامبه‌ری  ئاوه‌زیش ئه‌مه‌یان پێ خۆشتره‌ .