به‌ ناوی کوردستانی گه‌وره‌ .

ح. س. سۆران

تاران - 28/3/2708

شه‌ڕه‌ ده‌ندووکێ .

ته‌نانه‌ت زو‌ربه‌ی نه‌یارانیش مان ؛ ددان به‌ هێمنایه‌تی ، راست ویژی و بێگه‌ردی گه‌لی کورد دا ده‌نێن ، بۆ وێنه‌ تورکه‌کان به‌ وشه‌ی "سه‌داقه‌ت" ده‌ڵێن کورده‌واری ؛ هه‌رکات دژان پاکتاو یا‌ قه‌لاچۆشیان کردوویین ، ته‌نیا بۆ چاو ترسێن کردن ، پته‌و کردن و په‌ره‌دانی ده‌سته‌ڵاتی خۆیان بوه‌ ، نه‌ک بۆ تۆله‌ سه‌نده‌ن . چون به‌ ‌ شانازیه‌وه‌ ، ‌ کورد قه‌ت مافی که‌سی پاشێل نه‌کردوه‌ و وه‌ی بۆ که‌س نه‌بوه‌ ، تا تۆڵه‌ی لێ بستێنن . بزووتنه‌وه‌کانی کوردیش ، هه‌موی خۆ پاراستن و له‌سه‌رخۆکردنه‌وه‌ بوون‌ ، که‌ به‌ هه‌مو یاسایاکی جیهان به‌ کارێکی پیرۆز و ره‌وا ‌داده‌نرێ . ‌

به‌ڵام به‌داخه‌وه‌ ، ئێستاش که‌ له‌ هه‌زاره‌ی سێ داین ، هێشتا هێندێک له‌ هه‌ڵسوکه‌وته‌کانی سه‌رده‌می هۆزایه‌تی و هۆزسالاری- که‌ ئه‌ویش بۆ خۆی دوروشمی ره‌سه‌نی و پاکی له‌مێژینه‌ی گه‌لی کورده‌ ، که‌متا کورتێک ره‌گ و شوێنه‌واری هه‌ر ماوه‌ و ته‌نانه‌وت له‌ هێندێک کاروباری رۆشنبیریش دا ره‌نگ ده‌داته‌وه‌ ، که‌ به‌ کوردی ده‌توانین ناوی بنێین شه‌ڕه‌ ده‌ندووکێ یا قسه‌ به‌ زۆران دان .

بۆ وێنه‌ ، ئه‌گه‌ر که‌سێک ده‌می بسووتێ - زمانم لاڵ ، بیلامانێ بنووسێ یا بڵێ فڵانه‌ هۆنراوه‌ یا فڵانه‌ نووسراوه‌ی فڵانه‌ پێنووسه‌وان ، وشه‌یه‌کی له‌ جێی خۆی دا نیه‌ ، ئه‌و پێنووسه‌وانه‌ به‌رێزه‌ وا ئاڵۆز ده‌بێ و ده‌شله‌ژێ که‌ مه‌پرسه‌ !!!. ئه‌گه‌ر وشه‌ی دێمۆکڕاسی و بۆچونی خه‌ڵکی دیکه‌شمان له‌ لا به‌ڕێزه‌ و هه‌ر‌ خۆمان به‌ "مه‌ن" نازانین ، با بهێلین خه‌ڵکی دیکه‌ش بیروڕای خۆیان به‌ راشکاوی ده‌ربڕن و خێرا ، وه‌ک ئاره‌شی که‌مانگیر تیری تۆڵه‌یان بۆ نه‌ نێینه‌ ماڵی که‌وان وکه‌وانی تۆڵه‌ سه‌ندنیان بۆ هه‌ڵ نه‌گرین . با بهێڵین خه‌ڵکی خوێنه‌ر ، بابه‌ت ، نووسراوه‌ ، کتێبه‌که‌ی و... ی ئێمه‌ و بۆچوو‌نه‌کانی که‌سی هه‌ڵسه‌نگێنه‌ریش ( ره‌خنه‌گریش) بخوێننه‌وه‌ و ببیستن و بۆ خۆیان راڤه‌ و دادگه‌ری له‌سه‌ر بکه‌ن . ده‌بێ ‌ کاره‌کانمان له‌ خزمه‌ت دۆزی کورد دا بێ ، نه‌ک منمنایه‌تی و خۆمالێ خۆمالێ و ئه‌گه‌ر خانم یا کابرای ره‌خنه‌گر فه‌رمایشه‌کانی راست و دروست بو ، به‌ وردی گوێی بۆ شل بکه‌ین و بۆ داهاتو که‌ڵکی لی وه‌ربگرین ، نه‌ک خێرا چوار پێج لاپه‌ڕه‌ ته‌وس و توانجی بۆ بنووسین و هه‌تا هه‌تایه‌ ده‌نگی لێ دابگۆڕین – دڵنیا بن خه‌ڵک خۆیان باشترین داوه‌رن ، شت راڤه‌ ده‌کان و چاک و خراپ لێک ده‌که‌نه‌وه‌ و پێویستی به‌ شه‌ڕه‌ده‌ندووکێ و زۆران بازی ئێمه‌ نیه‌ . ئه‌گه‌ر خودای نه‌خواسته‌ ده‌رفه‌ت، ویست و خۆزگه‌ی شه‌ڕه‌ده‌نووکێ مان هه‌یه‌ ، با‌ له‌گه‌ڵ ئه‌وانه‌ بیکه‌ین که‌ ده‌گه‌شه‌ و بوختان و گزه‌و فزه‌مان له‌گه‌ڵ ده‌که‌ن ، ده‌یانه‌وێ ره‌گ و ریشه‌مان له‌ بندا هه‌ڵ بکه‌نن ، نه‌ک له‌ گه‌ڵ هاو خوێن و هاوده‌ردێکی خۆمان، که‌ ژانی ده‌رده‌ کوردی به‌ قه‌ت ئێمه‌ چێشتوه‌ و بگره‌ زیاتریش .

به‌ڵام ده‌بێ ئاوڕ بده‌ینه‌وه‌ سه‌ر ئه‌مه‌ش ، که‌ له‌ نێوان هه‌ڵ سه‌نگاندنی‌ دڵسۆزانه‌ ، تیز ، توانج و شه‌ڕی کۆنه‌ قین و ئه‌وانه‌ دا، تۆفیر زۆره‌‌ و خوێنه‌ران یا بیسه‌ران وبینه‌ران، له‌مه‌ش دا خۆیان باشتر داوه‌ری ده‌که‌ن . ناشبێ پێ مان وا بێ ، هه‌ر که‌س وتی پشت چاوتان برۆیه‌، ئه‌وه‌ فڵان و فیساره‌ و چی وچی !!! ره‌نگه‌ ئه‌و راست بکا . ئه‌گه‌ر ئه‌و راست بکا ، ئێمه‌ گوێی لێ شل بکه‌ین ، زۆرتر به‌ قازانجمانه‌ تا گوێ له‌ پیاهه‌ڵوتن و تاریفی بوش و بێخود بگرین .

بۆ ئه‌وه‌ی بزه‌یه‌کی ماناداریش بێته‌ سه‌ر لێوی سه‌روه‌رانی خوێنه‌ری ئه‌م نووسراوه‌یه‌ ، ئه‌م قسه‌ کو‌رته‌تان بۆ ده‌گێڕمه‌وه‌ : برایه‌کی زۆر دڵسۆز وپسپۆڕ ده‌یوت : رۆژێک ده‌مم سووتاو و له‌ کۆڕێک دا وتم هۆنراوه‌ کانی‌ فیساره‌ هۆنه‌ر، له‌ باری کێشه‌وه‌ زۆر ته‌واو نین ، ئه‌و هۆنه‌ره‌ ‌ ئه‌م قسه‌ی منی بیستبوه‌وه‌ و فه‌رمووبوی که‌ ئه‌و قسه‌ مفتانه‌ ‌ چێه‌ ده‌یکا ، له‌ بیرمه‌ نزیکه‌ی سی(30) ساڵ پێش ، پووری ( میمکی) حه‌زی له‌ کوێخایه‌ک ده‌کرد ، چۆن له‌ روی هه‌ڵ دێ باسی هۆنراوه‌ی من ده‌کا ، باسی پووری کا .

من پێم وایه‌ ، ئه‌و هۆنه‌ره‌ دڵناسکه‌ ‌، که‌ به‌ ڕاستی هۆنراوه‌کانی تۆزێ جێی تیبینی و ره‌خنه‌بوون ، له‌ باتی ئه‌وه‌ی که‌ڕه‌وکوڕه‌ له‌ پووری دڵته‌ڕی کابرای ره‌خنه‌ گر هه‌ڵ دا ، باشتر ئه‌وه‌ بو ته‌نانه‌ت بچێ سپاسیشی لێ بکا و کارێکی وا بکا له‌وه‌و دوا ، هۆنراوه‌کانی به‌ که‌ڵک وه‌رگرتن له‌ ئامۆژگاریه‌کانی ئه‌و ، شاز تر و رێک و پێک تر بنووسێ .له‌نگی هۆنراوه‌ چ په‌یوه‌ندیه‌کی له‌ گه‌ڵ حه‌ز لێکردوی پووری کابرا هه‌یه‌ ؟ ره‌نگه‌ پووری حه‌زیشی له‌ کوێخا کردبێ ، به‌ڵام له‌ قسه‌ی نه‌سته‌قی ‌ کوردی دا ، ده‌ڵێن " هه‌مزه‌ له‌ هه‌باسی چێ و ... له‌ ته‌ورداسی چێ ؟ "

ده‌ڵێن قسه‌ قسه‌ دێنێ :

له‌ لایه‌کی دیکه‌شه‌وه‌ باشتر وایه‌ ، له‌ پێناوی سه‌رکه‌وتنی دۆزی رۆشنبیری هه‌مه‌لایه‌نه‌ی کورد دا ، به‌ لای که‌مه‌وه‌ ، پێشاهه‌نگ و رۆشنبیره‌کان مان ریزبه‌ندی نه‌که‌ن ، ده‌سته‌ ده‌سته‌ ، تاقم تاقم و له‌ت له‌ت نه‌بن ، چون به‌ زمانی کوردی له‌ت بوون به‌ مانای شکانه‌ . ئه‌وه‌ گرنگه‌ چ خزمه‌تێک ده‌کرێ ، نه‌ک کێ ده‌یکا .

تۆغا وا نیه‌ ؟ ‌

تێبینی : ئه‌م نووسراوه‌یه‌، بابه‌تێکی گشتیه‌ و مه‌به‌ستم له‌ هیچ که‌س یا که‌سانێکی تایبه‌ت نیه‌ .

بگه‌رێوه