به‌ ناوی کوردستانی گه‌وره‌ .

ح. س. سۆران

تاران - 16/5/2708

ریشی میرزا زانا و ریشی نێریه‌ ره‌ش !!!

ده‌ڵێن له‌ گوندێکی کوردستان ، پیاوێکی دڵسۆز ، بلیمه‌ت ، به‌سه‌واد و ردێن سپی هه‌بو به‌ ناوی میرزا زانا ، که‌ به‌ پێی سه‌واد ، ته‌مه‌ن و ئه‌زموون ، بۆ ئه‌وه‌ ده‌بو گوێ له‌ قسه‌کانی شل بکه‌ی و به‌ گیان و دڵ، که‌ڵکیان لێ وه‌ربگری . ‌

رۆژێک میرزا زانا ، به‌ پیێ دڵسۆزیه‌ک ، که‌ سه‌باره‌ت به‌ دانیشتوانی ئاواییه‌که -‌ به‌ چه‌شنی زگماک له‌ خوێنی‌ دا بو -، له‌ به‌ڕبه‌ڕۆچکه‌ی دێکه‌ ، چوه‌ کن ‌ کۆیخای گونده ‌ که‌ و ده‌ستی کرد به‌ ئامۆژگاری کردنی و پێی وت ئه‌گه‌ر ئه‌و شتانه‌ی من ده‌یان‌ڵێم له‌ به‌رچاوی بگری ، به‌ سوود و قازانجی خۆت ، بنه‌ ماڵه‌ت و گونده‌که‌مانه ‌ و ده‌بێته‌ هۆی ئه‌وه‌ به‌سه‌ر زۆر که‌ندو کۆسپی ژیان دا زاڵ ببی .

کابرای کوێخا زۆر به‌ به‌ وردی گوێی لێ راده‌گرت و به‌ تاڵووکه‌ و له‌ کانی دڵه‌وه‌ ‌ ، ده‌یڕوانیه‌ ده‌م و ریشی میرزا زانا . میرزا زانا به‌مه‌ زۆر شاد بو و ئه‌م بارودۆخه‌ هانی دا ، که‌ قسه‌کانی به‌ تین و تاوتر بکا و پتر له‌سه‌ری بڕوا .

پاش نزیکه‌ی کاتژمێرێک ، میرزا زانا وتی زۆر به‌وه‌ دڵشاد بووم ، که‌ وا به‌ وردی و به‌ سه‌رنجه‌وه‌ چاوت له‌ من ده‌کرد و به‌ هیوام ، ئه‌م ئامۆژگاریانه‌ی من ، له‌ ژیانی ئێمه ‌و داهاتوی تۆ دا که‌ڵکی شیاوی ببێ .

کابرای کوێخا وه‌ڵامی داوه‌ ، ئه‌گه‌ر راستت ده‌وێ ، من قسه‌ کانی تۆم به‌ هه‌ند نه‌ده‌گرت و ‌به‌ مسقاڵ گوێم بۆ شل نه‌ده‌کردن ، ته‌نیا به‌وه‌ دڵم ده‌گه‌شاوه‌ ، که‌ کاتێ قسه‌ت ده‌کرد و ده‌م و ریشت ده‌جوولاند ، هه‌ر له‌ ریشی نێریه‌ ره‌شی من ده‌چو ، منیش چاوم پێی روون ده‌بوه‌وه‌ .

به‌ هیوام ، هه‌مو کوێخا کان وا نه‌بن و هێندێک گوێ بۆ وتارو نووسراوه‌کانی میرزا زانا کانی دڵسۆز شل بکه‌ن ، نه‌ک به‌ خۆشی ئه‌وه‌وه‌ ‌ بیلامانێ ، په‌رژینی قایم بێ‌، که‌ ریشیان له‌ ریشی نێریه‌ ره‌ش ده‌چێ، تێی بنۆڕن . دڵنیا بن به‌ سوودیانه‌ .

کوردینه‌ ! تۆغا وانیه‌ ؟

بگه‌رێوه