به‌ناوی کوردستانی گه‌وره‌

ح.س.سۆران

soransa@hotmail.com

   تاران

 ئاغا‌ڕه‌شی  که‌وانگه‌ر   !!!

 ره‌نگه‌ نزیکه‌ی ساڵی 2700 ی کوردی ( هه‌شت ساڵ پێش)  ، وه‌ک هه‌میشه‌ ، له‌ وه‌رزی هاوین دا ، چوومه‌وه‌ بۆ شاری بۆکانی رۆژهه‌ڵاتی کوردستان ، که‌ ئه‌ز  له‌ ئاواییه‌کی ئه‌و ده‌ڤه‌ره‌ هاتوومه‌ته‌ دنیاوه و زێدی هه‌ره‌ خۆشه‌ویستی منه‌ ‌. هه‌میشه‌ له‌و سه‌ردانانه‌  دا ، دو ئامانجی سه‌ره‌کیم بوه‌ و هه‌یه‌: (1) سه‌ردانی گڵکۆی دایک و  باوکم ؛ دیتنی  خزمان ، هاوبیران، هاواڵانی سه‌رده‌می منداڵی  ، هاودێیان ، هاوشاریان و ... ؛ (2) هه‌ڵسه‌نگاندن و راڤه‌ی بارودۆخی بزاڤی فه‌رهه‌نگی، کۆمه‌ڵایه‌تی و هه‌مه‌لایه‌نه‌ی ناوچه‌که‌ . هه‌ر له‌سه‌ر ئه‌م بناغه‌یه‌ ، زۆر جار شانازی ئه‌وه‌م ده‌بێ که‌ له‌و ده‌رفه‌تانه‌دا،  خه‌ڵكێکی زۆر ببینم ، بانگهێشتنم بکه‌ن ،تێکڕا بچینه‌ سه‌یران و سه‌ر شایی و زه‌ماوه‌ن و ئه‌گه‌ر به‌ ده‌گمه‌ن به‌رپرسان بیشهێڵن کۆڕێکی کوردی پێک بێ ، به‌شداری تێدا بکه‌ین ، که‌ به‌ پێویستی ده‌زانم سپاس له هه‌موی ئه‌‌وانه‌ بکه‌م ،که‌ خۆیان به‌ منه‌وه‌ ماندوده‌که‌ن و ئاوڕم لێ ده‌ده‌نه‌وه‌ .

 له‌و سه‌ردانه‌ی ئه‌و ساڵه‌دا ، وه‌ک هه‌میشه‌ یه‌کێک له‌ سه‌روه‌ران                (‌ لێره‌ دا به‌ ئه‌نقه‌ست خۆم له‌ ناوهێنانی ده‌بوێرم)  ،که‌ زۆر له‌مێژ بو ده‌یفه‌رمو "ده‌مه‌وێ بێی بۆ ماڵی ئێمه‌ و میوانداریت بکه‌م " ، بۆ نه‌هار با‌نگهێشتنی کردین و چون ده‌یویست هێندێک مه‌به‌ستی تایبه‌ت باس بکا ، فه‌رموی با‌ خه‌ڵکی دیکه‌ زۆر نه‌یه‌ن ، به‌ڵام من             وتم :"  هه‌ر کوێیه‌ک ده‌چم ، هاوبیر و هاواڵی خۆشه‌ویست و            نزیکم ، کاک به‌نگینی ساڵحی کتێبفرۆش  له‌گه‌ڵمه‌ " (تێبینی : به‌ داخه‌وه‌ ئێستا ،کاک به‌نگینی خۆشه‌ویستم  نه‌ماوه‌ ) . ئه‌و خانه‌ خوێیه‌ش فه‌رموی ، "ئه‌ گه‌ر وایه‌ وا له‌ تۆ نزیکه‌ ،  با ئه‌ویش بێ "  .

 هه‌ر چۆن بو ، به‌  سێ نه‌فه‌ری ،  له‌ کتێببفرۆشیه‌که‌ی کاک به‌نگینه‌وه‌ ، نزیکی کاتژمێری 11 ی پیش نیوه‌رۆ ، به‌ره‌و ماڵی خانه‌خوێکه‌مان رێ که‌وتین ( خانه‌ خوێ + کاک به‌نگین + من ) . له‌ چوار رێی  که‌بابی به‌ ناوبانگی  فه‌قێ ره‌ت بوین ، کاک به‌نگین که‌ له‌ لای راسته‌وه‌ ده‌رۆیی، هاواری لێ هه‌ستا و وتی " فریا که‌ون ! کۆێر بووم !!!" ، ئێمه‌ش به‌ سه‌رسووڕمانه‌وه‌ ته‌ماشامان کرد ،  تیرێکیان به‌ که‌وان  بۆ لای ئێمه‌ خستبو ، که‌ تیره‌که‌ راست که‌وتبو  له‌ به‌ر ته‌وێڵی کاک به‌نگین ، خوێن به‌ ده‌موچاوی دا هاته‌ خواره‌وه‌ و گشت سیپاله‌ کانی شه‌ڵاڵی خوێن بوون - ، بێتو ته‌نیا دو سانتیمێتر له‌ خوارتره‌وه‌ لێی بکه‌وتایه‌ ، دڵنیام  کویڕ ده‌بو  .

 هه‌ر‌چۆن بو ، په‌یکانی تیره‌که‌مان ورده‌ ورده‌  ده‌رهێنا ، له‌و نزیکانه‌ ده‌واخانه‌یه‌ک بو ، هێندێک ده‌رمان مان وه‌رگرت و  زامه‌که‌مان  تۆزێک سارێژ( تیمار) کرد  ، به‌ڵام ئه‌گه‌ر ئه‌و په‌یکانه‌ له‌ چاوی هه‌ر کاممان   بکه‌وتایه‌ ، ره‌نگه‌ کوێر یا نوقسان ببوایه‌ین . جا ئیدی نازانم ئه‌و تیره‌‌ ، گولله‌ی وێله‌کی بو یا سه‌ری کردبو یا خۆد کورتی هێنابو ؟  تێبینی: ‌ ئه‌و دو خۆشه‌ویسته، ‌ گشت رۆژێک به‌م رێگه‌یه‌ دا ده‌ڕۆین و شتی وایان به‌سه‌ر ناهاتبو ، هه‌ر من هه‌وه‌ڵ جارم بو له‌و کاته‌ دا ، به‌وێ دا ده‌ڕۆیم .

 گه‌لۆ ! وادیاره‌ ئێستا که‌ ئاره‌شی که‌مانگیری  قاره‌مان مان  نه‌ماوه‌ ،   ئاغا ‌ره‌شی که‌وانگه‌ر  له‌ جێیه‌تی ، به‌ڵام  ئه‌م  سێره‌ له‌ شتی جوێ  ده‌گرێ !!! .