زووڵمستان  ... !! .                حه‌مید عه‌زیز 

زووڵمستانه‌ ئه‌م جه‌نگه‌ڵه‌‌ وێران و تاریکه‌ی ده‌سه‌ڵات‌ هه‌سته‌ بڕۆین من و تۆ

له‌مێژه‌ خاپووره‌ ئه‌م ده‌ڤه‌ره‌ تاریکه‌ جه‌نگ و پرسه‌و‌ قه‌برستانه‌ بۆ من و تۆ

ئێره‌ گۆڕه‌پانی پاره‌و زۆردارو بێعاره‌‌ نامۆیه‌ به‌ئێمه‌ ئه‌م کیشوه‌ره‌ پڕئه‌سرینه‌

ژه‌هرستانه‌ ئه‌م مه‌مله‌که‌تی خوێنه‌‌ غوربه‌ت و خه‌رابستانه‌ نیشتمانی من و تۆ

گووڵم بڕوانه‌ ‌خاکی بێگانه‌ که‌چه‌ند جوان و ڕازاوه‌یه‌ به‌سه‌لیقه‌ی خه‌مخۆرانی

مخابن ده‌ست پیس و ناکۆکن سه‌رانی ئێمه‌ سه‌یری که‌لاوه‌ی داڕماوی من و تۆ

سه‌دان ساڵه‌ باب و باپیری ئێمه‌ به‌شیان زووڵم و کووشتن و به‌ندینخانه‌یه‌‌‌

واچاکه‌ ڕوو له‌هه‌ورازو نشێوی ‌غوربه‌ت بین به‌سه‌ سته‌م کوا ژیاوین من و تۆ

سه‌رهه‌ڵگرین چاکه‌ بڕۆین ئێمه‌ دیللی ده‌ستی خۆمانین سه‌د ڕه‌حمه‌ت له‌کفن دز

دوێنی هێنده‌ بێ به‌ش و هه‌ژار نه‌بووین بڕوانه‌‌ ئه‌مڕۆ داماوو ڕسواین من و تۆ

پۆلیس و جه‌رده‌و ژن کووژن میرو ده‌سه‌ڵاتی خێڵ له‌گۆڕه‌پانی سووری نیشتمان

که‌س به‌که‌سه‌ سه‌رو کلکی نیشتمان ڕۆیی کێ به‌ئاگاو به‌په‌رۆشه‌‌ له‌ ‌من و تۆ

خاک چۆڵ و هۆڵ بوو میلله‌ت کۆچ و ڕه‌وو ده‌که‌ن‌ له‌تاو جه‌ورو سته‌می ده‌سه‌ڵات

هه‌مووی گۆڕی ژنانه‌ ئه‌م خاکه‌ سوره‌ کام یاسای پیاو به‌رگری کرد له‌من و تۆ

کچی خۆم هه‌ناسه‌م غوربه‌ت و دووری مردنه‌ ژه‌هری تاڵ و‌‌ ته‌نیایی یه‌ مه‌نفا

لێره‌ش کۆیله‌و خزمه‌تکارو لاوازین ڕووبکه‌ینه‌ کوێ کوا جێگه‌یه‌ک بۆ من و تۆ

له‌بیابان و چۆڵی قوڵفه‌ گیرمان خواردووه‌ چه‌ته‌و ڕێگرو جه‌ندرمه‌ دۆستمانن

تازووه‌ هه‌سته‌ بامشووری خۆمان بخۆین له‌پارله‌مانیش زووڵمستانه‌ بۆ من و تۆ

 حه‌مید عه‌زیز  

Hamid773@hotmail.com

تێبینی :  ووشه‌ی ( من و تۆ )  هێمای گفتووگۆی نێوان دایک و کچه‌ .