نه‌ورۆز : پیره‌مێرد

نه‌ورۆز
ئه‌م ڕۆژی ساڵی تازه‌یه‌ نه‌ورۆزه‌ هاته‌وه‌
جه‌ژنێکی کۆنی کورده‌ به‌خۆشی و به‌هاته‌وه‌
چه‌ند ساڵ گوڵی هیوای ئێمه‌ پێ په‌ست بوو تاکو پار

هه‌ر خوێنی لاوه‌کان بوو گوڵی ئاڵی نه‌وبه‌هار
ئه‌و ڕه‌نگه‌ سووره‌ بوو که‌ له‌ ئاسۆی بڵندی کورد
مژده‌ی به‌یانی بۆ گه‌لی دوور و نزیک ئه‌برد
نه‌ورۆز بوو ئاگرێکی وه‌های خسته‌ جه‌رگه‌وه‌
لاوان به‌ عه‌شق ئه‌چوون به‌ به‌ره‌وپیری مه‌رگه‌وه‌
ئه‌وا ڕۆژ هه‌ڵات، له‌ به‌نده‌نی به‌رزی وڵاته‌وه‌
خوێنی شه‌هیده‌ ڕه‌نگی شه‌فه‌ق شه‌وق ئه‌داته‌وه‌
تا ئێسته‌ ڕووی نه‌داوه‌ له‌ ته‌ئریخی میلله‌تا
قه‌لغانی گولله‌ سنگی کچان بێ له‌ هه‌ڵمه‌تا
پێی ناوێ بۆ شه‌هیدی وه‌ته‌ن شیوه‌ن و گرین
نامرن ئه‌وانه‌ وا له‌ دڵی میلله‌تا ئه‌ژین

پیره‌مێرد